Logo della Provincia di Oristano

Provincia di Oristano - sito web ufficiale

Chie semus

Chie semus, in ue semus e ite faghimus

Su postale

Su servìtziu, afidadu a sa sotziedade Cooperativa L’altra cultura, at a èssere ativu fintzas a su 31 de nadale de su 2022.

Su progetu “Su sardu: limba bia”, cuncordadu a manos de pare cun su Comune de Aristanis e su Comune de Crabas, est istadu finantziadu a sa Provìntzia de Aristanis (art. 9 e 15 de sa Lege 482/1999; Lege Regionale 22/2018). 

Su servìtziu naschet pro respòndere a sos bisòngios de sos amministradores, de sos dipendentes pùblicos e de sos tzitadinos chi cherent impreare sa limba sarda finas in sas fainas de s’Amministratzione Pùblica o in sos raportos cun s’Amministratzione Pùblica.

S’ufìtziu est a disponimentu de totu sos tzitadinos de sa Provìntzia, istudiantes, mastros de iscola, assòtzios culturales, consultas de giòvanos, bibliotecas e ludotecas comunales etc. pro informatziones, aprofundamentos, dudas, curiosidades e cussìgios chi pertocat sa limba sarda e s’impreu suo in sos raportos cun s’Amministratzione Pùblica, pro consulèntzias didàticas, bibliogràficas, sitogràficas, grammaticales e ortogràficas in contu de limba sarda.


IN UE SEMUS

S’Ufìtziu est acasagiadu in su primu pranu de su Palatzu de s’Amministratzione Provintziale de Aristanis in bia Enrico Carboni, 4.

Sos operadores de isportellu si podent cuntatare ònnia die (dae su lunis a sa chenàbura mangianu 09.30/13.00) a su nùmeru 0783.793347 o a custu indiritzu de posta eletrònica: limbasarda@provincia.or.it 

Pro ischire sas novas e èssere semper informados de sas fainas chi cuncordat s’ufìtziu faghet a intrare a su giassu istitutzionale de sa Provìntzia de Aristanis (http://www.provincia.or.it) a sa setzione “Ufìtziu de sa limba e de sa cultura sarda”.


ITE FAGHET S’UFÌTZIU

Sa punna de s'ufìtziu est de traballare pro promòvere e favorèssere s’impreu de sa limba sarda in àmbitos diferentes (amministratzione pùblica, iscola, famìllia etc.) e pro:

  1. assegurare un'impreu prus mannu de su sardu in sa sotziedade e in sos raportos de pare a pare;
  2. afortigare e megiorare sa cumpetèntzia linguìstica e comunicativa de sos chi faeddant in sardu;
  3. fàghere a manera chi sa limba sarda siat leada prus in cunsideru in sas comunidades de su progetu;
  4. assegurare chi sa limba sarda siat trasmìtia a sas levas noas e chi su sardu potzat sighire a èssere limba mama.

CUNTATOS

Provìntzia de Aristanis

carrera Enrico Carboni, 4 – 09170 Aristanis

Tel. 0783 793347

Posta eletrònica: limbasarda@provincia.or.it 

Oràriu: dae su lunis a sa chenàbura  9.30 – 13.00

CANDO EST NÀSCHIDU S’UFÌTZIU PROVINTZIALE?

S'isportellu linguìsticu de sa Provìntzia de Aristanis est istadu ativadu pro sa prima borta in su 2004 gràtzias a sos contributos de sa Lege istatale 482/99. In custos annos sa Provìntzia at fatu unu traballu mannu e de importu pro fàghere intrare su sardu in sa vida pùblica e pro nde favorèssere s'impreu in sa vida de onni die. At impreadu sa limba sarda in sa normalidade cuncordende atòbios, cursos e atividades formativas e culturales pro fàghere a connòschere s'istòria e sa limba sarda e fàghere a cumprèndere cantu sa limba e sa diversidade linguìstica sunt una richesa manna de amparare pro su tempus benidore. A intro de sas atividades cuncordadas dae s'Ufìtziu est pretzisu a regordare su Postale de sa Limba sardaDischente, Sas dies de sa limba sarda e publicatziones meda chi apassionados, istudiosos e amantiosos de sa limba sarda podent pedire a sa Provìntzia o pedire in prèstidu in sas bibliotecas comunales de su territòriu.

Pro pedire publicatziones e materiales cuncordados dae s’Ufìtziu de sa Limba sarda de sa Provìntzia tocat a nd'iscarrigare su mòdulu e a nche ddu torrare a mandare compiladu a custu indiritzu de posta eletrònica: limbasarda@provincia.or.it.

(A.F., M.M.)